بيتر هوركوس
بيتر هوركوس هولندي مواليد 11 مايو 1911 .. لما اتولد ، الغشاء الجنيني كان ملفوف حوالين راسه لمدة 6 شهور لحد ما الدكاترة قدرو إنهم يشيلوه وده كان سبب في إن نظره يكون ضعيف ... بيتر لما كبر و بقى عنده 30 سنة كان بيشتغل في دهان البيوت سنة 1941 - و هو واقف بيدهن بيت ، إتزحلق من على كرسي و وقع من الدور الرابع .
بيتر دخل المستشفى و في الفترة اللي قعد فيها في المستشفى إكتشف إنه لما بيلمس حاجة ، مخه بيجيبله تاريخ الحاجة دي و كل حاجة متعلقة بيها .
مجنون ولا عاقل !!
بيتر في الأول إفتكر نفسه مجنون لحد ما بالتدريج بدأ يستوعب إن عنده موهبة ماحصلتش قبل كده ... بيتر خرج من المستشفى و الناس بدأت تعرف موهبته لحد ما الشرطة بعتتله عشان يشوفو لغز سلسة حرايق بتحصل في مزرعة .
كل اللي إحتاجه بيتر هو قفل محروق من المزرعة و قدر يفك اللغز و يكشف عن الشخص اللي ورا الحرايق دي .
بيتر وازالة الغموض !!
بريطانيا سمعت عنه ، فـ جابوه عشان يفك لغز ماسة مسروقة من كرسي التتويج في كنيسة ويستمنستر و خلال 3 أيام بيتر عرف مين اللي سرقها و كانو شوية شباب صغيرين و سرقوها على سبيل الهزار .
وصلت أخبار بيتر لأمريكا وهناك إستدعاه دكتور إسمه أندريا بوهاريش و هو متخصص في علم وظائف الأعضاء و الطب الباطني و الدراسات العصبية و كان عامل معمل بحوث عشان يشوف الظواهر العقلية زي التخاطر و كده .
المهم الدكتور ده إستدعى بيتر و اللي كان متكفل بفلوس الدعوة دي رجل أعمال إسمه هنري بيلك .
موهبة ولا تنجيم
عملو لبيتر إختبارات لمدة شهرين و كانت عبارة عن إنهم بيدوله أظرف مش باين فيها إيه من جوه و بيتر المفروض يخمن ايه اللي جواها و بيتر كان بمجرد ما بيمسك الظرف من بره ، بيعرف على طول ايه اللي جواه و نسبة نجاحه كانت 80% و دي نسبة كبيرة جدا .
عشان يتأكدو زيادة إن اللي عند بيتر دي موهبة مش أي كلام ، حطوه جوه قفص مقفول و معمول من النحاس عشان يمنع دخول أي موجات كهرومغناطيسية و نجح بيتر برضه في الإختبار ده .
سنة 1957 بنت رجل الأعمال اللي كان متكفل بإقامة بيتر إختفت و طلب من بيتر يشوفله بنته راحت فين ... بيتر قعد يركز عشان يعرف مكانها و شاف صورة للبنت و هي غرقانة جمب مرسى للمراكب تحت الميه .
لما بيتر قال لرجل الأعمال الكلام ده ، راح على المكان و لقى بنته فعلا بس رجل الأعمال طرد بيتر عشان هو إزاي ماعرفش إن ده كان هيحصل لبنته و يقوله قبلها عشان يلحقها قبل ما تغرق .
تشخيص بيتر هوركوس
سنة 1960 دكتور اسمه ريجيس ريزمان - دكتور متخصص في علم الجريمة و من أشهر الدكاترة النفسيين - إستدعى بيتر عشان يختبره و راح بيتر لبيت الدكتور و أول ما شاف بنت الدكتور اللي كان عندها سنتين و نص و عندها شلل في مخها مش بيخليها تمشي . بيتر بص للبنت وقال إن هتمشي لأول مرة في عيد ميلادها يوم 21 ديسمبر و بعدها بـ 4 أيام هتروح لشجرة الكريسماس و تاخد الهدية بتاعتها بإيديها و بعدها هتمشي على طول
الكلام ده اتقال يوم 11 يونيو 1960 و في يوم 21 ديسمبر حصل اللي قال عليه بيتر بالظبط . كلام بيتر ده كان معناه إن بقى عنده القدرة إنه يقرا حاجات هتحصل في المستقبل و هو طبيعي كان عنده القدرة إنه يقرا حاجات حصلت في الماضي
نورما لي براوننج
من الناس اللي كانت مؤيدة بيتر هي صحفية إسمها نورما لي براوننج و دي عملت كتاب مخصوص عنه و ذكرت فيه المواقف بتأكد موهبة بيتر
بيتر في خلال حياته كلها كان سبب في حل ألغاز كتيرة و قضاية متعلّقة البوليس مكنش قادر يحلها وماحدش قدر يفسر موهبة بيتر و لا عرف يفهم هو إزاي قدر يعمل كل اللي كان بيعمله ده بيتر مات في يونيو 1988 .
تعليقك يهمنا ❤